Bisdak Words

Carbon

Ang bidlisiw sa adlaw
Bahandi sa akong ig agaw
Sa karton naka-idlip ug buot dili papukaw
Apan natugaw sa huna-huna og unsay ipamahaw

Mga tawo nga naghugyaw
Musinggit kay gusto mupakyaw
Pila ka libo ang nag lakaw-lakaw
Mga tiil nga napuno sa hugaw

Tabang! Matod pa sa usa ka inahan
Mga mata nagtubod ang luha kay nalabnihan
Salapi nga hinago-an dili buot usikan
Apan nahanaw taliwala sa ngit-ngit nga dalan

Mga dagway nag simbolo sa akong pangutana
Adona ba kaha’y kalinaw nila
Mga mata nga napuling sa hustisya
Pangandoy nga makatulog sa humok nga kama

Lugar nga yano’ng pangita-on
Mga pahiyom nga lisod kawaton
Kusog sa pagtulod sa kagang-kagang nga kariton
Karga ni ini ang mga nag awas-awas nga sugilanon

Mga balak ni Echu! Follow Maricho Rollan